Deseñada polo tipógrafo suízo Hans Eduard Meier, Syntax está baseada na escritura minúscula do renacemento e nas capitulares lapidarias romanas cun tratamento racionalista inusual. Esta tipografía sen serifa conserva formas do estilo humanista ou Old Style dando como resultado un tipo altamente lexible cunha ampla gama de aplicacións como sinalizacións, publicidade ou empaquetado. Os debuxos orixinais foron realizados en 1954, primeiro escribindo as letras cun pincel, despois redebuxando as liñas esenciais das letras e por último engadíndolle peso a esas liñas. A intención de Meier era a de expresar sutilmente o dinamismo rítmico das letras escritas e ao mesmo tempo producir unha tipografía sen serifas lexible. Consta dunhas ascendentes altas, maiúsculas con proporcións clásicas e estilo humanista nas letras “a” e “g”. Esta tipografía foi dixitalizada en 1989 e Meier volvería a traballar nela, aumentando e mellorando a familia en 2000.